La casa de me noni, l’è na casa sémplisse e sensa lusso, se pol dir anca piena de umiltà. Tutavia la ga l’autentissità benedeta e sacra de una cesa, sensa richessa e sensa oro, una cesa solamente de simplissità e verità. Cossl, co i òcii de me anima, la vedo sempre bela e maestosa, mèio dir imponente compagno de un vero palasso. La so imàgine l’è par sempre ntea me scàtola dei ricordi. Adesso, cento ani fà, quel nono, la nona e so fioi, con speransa e credensa in Dio e dopo de una quantità infinita de storsi, i la ga alsada su de taule de pin, in tea longhessa de sinque metri, tute taule bele, sensa gnanca un gropo, taiade co I’segoto de man, co la forsa dei brassi del nono e so fioi, dopo i ghe passea calsina, par darghe vita longa. La fundassion fata de sassi, tuti taiadi e metesti a posto co caprìssio e passiènsia, par èssere dopo la stanza dea cantina, co le bote de vin e bachete de salam e osacol. Le finestre fate de legno, de le più bele piante del mato, finestre bele e dopo squase sempre verte par vegner rento n’aria serena dopo dea tempesta. EI coerto fato de scàndole, par tegner la piova e la brina, santissima e bela stesso neve. La gà due cosine: rento dea casa, la prinsipale, co le poche pignate smaltae che lagàvea, e nte altra banda, un pochetin retirata, nantra, più vècia, co I’fogon de matoni, sempre co I’fogo infiamà e la pignata dea polenta, acompagnata de altre pignate co l’aqua drio boier, par cozer i bigoli e taiadele. Nte quela cosina gavea la tola granda ndove i noni e so fioi in torno magnea, dopo de l’orassion. Ntel primo piano ga la stanza co la scarsa mobilia e ndoe zera picadi su nte le parede i ritrati dei antenati, la gavea anca la càmera dei noni, co nte le parede, l’imagine dea Madona e Gesù. Par andar al secondo piano, gavea na scala con diese scalìn, che portea a le càmeere dei zii e zie. La gavea i lèti de paioni de scartossi de milio. Nte queste càmere ga nassesto mio fradel Ventura, nte quel tempo che I’mondo iéra più sémplisse e fraterno. Sempre che vao trovar el paeselo dei noni, la par sora i monti, ntea località de Ligna bela, cità de Dr. Ricardo, Provinsìa de San Piero, go gusto de veder la casa sentenària. Quando rivo davanti, un po’ distante, sentà nte un sasson, in silénsio scominsio a reminar quela casa sbandonatà, adesso sensa el giardino di fiori dea nona de una banda e sensa el vignal del nono de quelaltra. Adesso, se poi dir che la ga la someiansa de na granda signora, vecia, piena de riga ntea testa parvia dea età, magari ancora bela e piena de tenassità, come zera el carater dei nostri antenati. Alora nte quel momento co i òcii fesciàdi, me par da veder, la imàgine del nono Umberto, sentà davanti la cantina, nte so caregon predileto, con so capel de ala scavessada in su e drio molar par ària na fumana de so pipade e anca acompagnà de so due amici, Santantoni e San Piero. Dopo, ancora co i òcci fesciàdi e la man ntel cuor, nte me testa vien l’imagine dea nona Carolina con so fassoleto in testa, bela e imponente come zera so casa, la vedo ntel giardino, drio spergir àqua ntei fiori: margherite, garòfoli sossi, beiòmeni e gìlii bianchi come la fàcia dea Madona, fiori benedeti del giardino del cielo, parvia che adesso, per i so ati, so laoro, so bontà, la ze in paradiso insieme ai santi.