Sot al maestoso Pizhoc  / vesin al tranquilo Veses / dale valade, dai coi de Cergnai, San Gregorio, Cesio e Santa Giustina / son in partenzha / col viso bagnà dale lagrime,

ma col cor pien de speranzha.

Asson la cara tera che ne à vist naser, / zhercon ‘n altra  tera, / sconosesta, misteriosa.

I ne promet la cucagna in America, /  ma no saon cosa che ‘l é ‘sta Merica; / i ne dis che la é  lontana / bela e piena de schei / che la ne piaserà de segur.

Quaranta dì e quaranta not, / tante lagreme, lamenti /  e fursi … anca pentimenti, /

ma ne dison corajo / sani, arivederghe / o fursi adio par sempre .

Son in trentadoi, belunesi / veneti, ma prima ancora italiani, / son in partenzha /

col cor spacà dal dolòr / col stesso cor / la stessa speranzha / de ben rivar.

Me nono Piero/sarà la nostra guida te ‘stà aventura, /ma anca el /come Mosè par i Ebrei / nol vedarà la nova tera: / son partidi in trentadoi / son rivadi in trentaun !

Tra zhinquanta, zhento / Zhentovintizhinque ani / saron ‘na moltitudine / de italo – brasiliani /De Bastiani, Cassol, / Zanella, Pagnussat / Casagrande e po’… tanti de altri!

Saluti, sani, arivederghe / a oaltri che resté,/ fradei, sorele, neodi ./ Sani Giacomo, /

steme ben Agata, Rebecca, Valentino, / fursi se vedaron ancora!/ Mosè, Augusta e Nani / che ‘l Signor al sia / al ostro compagno / che la Madona la ghe protege .

Parton con poc te le man, / le scarsele svodade dale tasse, / ma ‘l nostro cor al é pien/

de speranzha e de tanti sogni. / La fameja, la fede  e ‘l laoro / questa la nostra eredità /

fursi son solche dei sognatori / ma de segur saron vincitori!

Parton con la protezhion / de Santa Giustina / e rivon sul mantel / dela Signora Aparecida. /

Dai piè del Pizhoc son partidi / in trentadoi tel 1887 / e tela Serra Gaucha son rivadi /

in trentaun tel 1888.

Adess in tutt al Brasile tel 2012 / saron otomilizinquezhento! /

‘Na storia de onor / de ‘na fameja de emigranti,/ tante storie de onor / par tante fameje de emigranti / belunesi, veneti / ma prima de tut Italiani!

Adess italo – brasiliani!

Agostinho Baldin, Curitiba (Paranà –Brasile) – 13 Marzo 2012