L’e quasi finìda la nòt,
l’e stàt al vent, che l’à spazàda via
forse par farne veder tut.

L’ à spazà via le nuvole,
forse par farne veder i cròt.

En tordo la do sul perèr
l’ à già fat le prime subiàde
e pò canta ‘n merlo e pò tuti i altri,
senti che canzon intonàde !

Lassù da drìo ghe ne ‘ncora ‘n tòc de luna
che pròa sconderse drìo le Vete.

Na porta che se vèrde e ‘n camìn che fuma
le femene l’e già su par fàr le panète.

Chi che parte pa ‘ndar a laoràr,
e chi ch’e ‘ncora tel lèt, e chi ‘n tela stala,
a tute ste robe no i à temp de pensàr.

Vàrda che ciàro drìo ‘l Visentin,
fra poc te vede anca ‘l sol a spuntàr,
an ràgio ‘l ghe à già scampà in su,
sul me Pizòc, che no son mai stuf de vardàr.

El par fogo, su la Piazza del Diàol !
forse propio par quel, i la ciàma cossì !

Pàre!, gnen fòra dal stàol,
a veder sto incanto, anca tì.

Le montagne béle nete, l’è cossì da vesìn,
che me par propio de tocàrle coi det,
e adesso che ‘l sol, l’e su ‘ncora ‘n cin
no se sente gnanca pi ‘l frét.

I camp aràdi i pàr tanti de spèci,
co le zhope lucide de tèra reoltàda,
là do ‘l Piave, che quasi ‘l to i òci
dall’ acqua che slussa ‘n poc agitàda.

Se impìzza el rumor dei laóri,
quel de la fórzhes da vit
e quel de la vanga sull’ ort.

Se impìzza tuti i colóri,
quel rosa dei perseghèr,
e quel vért dei prà strozhàdi,
quel giàl dei cornolèr,
e quel dei camp aràdi.

Ma varda lassù, la prima zesìla
l’é rivàda propio ‘ncoi,
‘ncoi che scomìnzia la primavera.

E quel’altre? Forsi doman da sera!

L’e na stagiòn che me piàss
parchè, la me da coràio
a veder tut che rinàss,
anca se l’e sol de passaio.

Se fusse sempre l’inverno,
el pra no’l sarìe mai vert.

Se fusse sempre l’otùno,
dale foie sarìe già quért.

Se fusse sempre l’istà,
dal sol sarìe già còt.

Se fusse sempre la primavera,
drìo scriver, sarìe dì e nòt.

I. G.