Carneval al scominzia
al dì de l’Epifania,
e co riva la Quaresema
al ne saluda co alegria.

Come bòce ste zornade,
le se cén tute par man,
le fa na bissa boa,
co ‘n mucio de bacàn.

Se na sbrancada
de coriandói
i te capita tél viso,
dai, Nono, no far al muso
ma fa su an bèl soriso.

Lassa perder i pensieri,
che te porta su la schena,
a pensarli i se fa grossi
e pal cór, l’ é na péna.

Dai, anca se te se Nono,
meti su na mascheréta,
cronpete tre stele filanti,
doi coriandoli e na tronbéta.

Daghe man a Zoro,
a Sandokan, a l’Arlechin,
a Cenerentola,a Pinochio,
come che te fusse picenin.

Ridi a Capuceto Rosso,
al Lupo, a la fata turchina,
a l’indian co tante piume,
a Pierot e a la damina.

Se un vestì da Sceico
col fis-ciòt al fa bacàn,
ti, strópete le recie…
No far l’urlo de Tarzàn!

Pensa che rive “Fulmine”
se la se mete pitòst mal,
tant, i dis che a Carnaval
ogni scherzo al val!

Luigina Tavi