Cara Gente,
scrive ste righe par descriver quel senso de vodo
che in tut al dì nol pasa in nessun modo!

Dan dì a quel’altro no se sent parlare de altro,
tante notizie brute, tut al mondo con problemi de salute!

An virus che pol reoltarne tuti, bei e bruti,
siori e poaret, ma che nesun al vet!

Che porcaria, na vera e propria pandemia!

Na gran confusion su tante restrizion!

I ne dis che val la pena che stone in quarantena,
che questa l’è na guera da sta coi piè par tera,
tuti entro casa senza scampar,
gnanca in Cesa no se pol pì ndar!

Par quei che spazi non i ghe na, ciapa quei de le cità,
la vede dura tut al temp fra quatro mura, pieni de paura!

Tason che qua da noi son fortunadi,
an tochet de prà, an camp, al ort,
se cata da far de qualche sort!

De far la spesa ognun se indegna,
pur de aver la panza piena!

In fila muti, con mascherina e guanti,
pì den metro de distanza tuti quanti!

Che se dà da far l’è le Cassiere, i Corrieri, i Volontari,
che in te ‘sti dì i riscia senza vardar orari!

Che impresion! Ospedai pieni in tute le Region!
In prima fila i veri Guerrieri,

Operatori, Medici e Infermieri,
che i dà l’Anima e anca al Cor,
par curar i maladi, solevarli da dolori,
piander e morir con Lori!

No se pol far finta de gnent
e veder scorder via così così i nostri noni, la nostra dent,
senza na careza, an baso, an ultimo saludo dai parent!

Manco mal che la natura no la conos paura,
e a scaldar al Cor ghe ha pensà la primavera,
che senza far rumor,
la impienise la tera coi so fior!

No, … l’è vera che tornerà tut come che l’éra;
già sera quasi in denocion,
co stà bota qua l’economia la va a balon!

Gnanca al temp ne farà desmentegar,
e par tant ghe n’avaron da contar …

Quan che tut questo paserà,
a ognun le proprie riflesion,
parché entro de noi saveron
se tuti i nostri pecà avaron purgà.

Renata Corso – Mel