AL PRESEPIO

L’era ani che volée

far ‘na roba là in saloto,

ma an cinét me vergognée

e po’ ‘ndée zogar al loto.

Ben, lo fàe, ho dit ‘sto an;

l’é question de far ossequio,

proprio co’ le me do man

costruise an bel Presepio.

Càte al muscio sul murét,

la giaréta fora a Prade…

Manco ml che co’ ‘sto frét

nesun gir pa’ le strade.

Po’ son ‘ndat lasù in sofita,

me vien drio soltanto al gat,

co’ ‘na roba mi l’ho dita

redevente an cin tosàt.

Méte tut là su la tola,

tel canton de la fenèstra,

me mojer l’é ‘ndata sola

a  far ginastica in palestra.

Sul comò va al compensato,

contro al mur méte al cartón,

e par farghe posto al prato

sposte la television.

Tire fòra la Madona,

i Re Magi e ‘l Bambinèl,

poi coi pié su la poltrona

tache a bàter col martèl.

Torna a casa a l’improviso

la me fémena sudada;

mi ghe mostre an bel soriso,

la me impira co ‘n ociada.

“Co’ i te vede po’ i to fioi

i te dis: “Cosa atu fat?”

Son sicura, tuti doi

i te ciapa par an mat.

Te ha sporcà tut al saloto!

Néta su, che ho da scampar:

vae comprarme an bel capòto,

e se ho temp anca ‘l magnar”

La continua quale osèssa:

“Doman presto scampe via,

co le amighe, dopo Messa,

monte su la segiovia”!

“Cosa dighe ai do tosat,

te sa che no i sta mai boni…”

“Lori doi, ti e anca al gat,

andé fora dai so’ noni!”

Me fìa entra pal porton,

la ne varda tuti doi,

la ne dis che religion

a l’ é l’opio dei  moltói.

(Po’ ghe sona al cellular,

l’é n’amiga che la ciàma,

co’ la finis de parlar

la vol schei da lo so mama.)

Ghe risponde: “No te vede?

No te capis proprio gnént!

Al contrario, l’é la droga

crede e fede de la zènt”:

Al pì piciol l’era cét,

serà nela camereta:

navighéa su Internét

(con in testa na baréta).

Al vien fora e ‘l dis: “Va’ pian

co ‘sta storia del Presepe,

che se ofende al non cristian

se se prega san Giusèpe;

la maestra l’avón vista,

che del Bambinèl Gesù,

par ‘no èser ‘na razista,

no’ la vol parlar mai più!”

“L’é la mejo de ‘sto an! –

dighe – sente e no ghe crede!

par rispèto al cafetàn

se rinunce a la me Fede!”

Me sta ben,l’ é colpa mea;

che par farme rispetàr

anca al nòno me diséa

ogni tant de bastonàr!”

No l’é ‘l caso che ve conte

‘sto dialogo tra sordi.

Fàe ‘l sentiér, la grota, al ponte

e sprofonde nei ricordi.

Là al laghét, là al paesèl,

le montagne su lo sfondo…

‘sto Presepio l’é pì bel

de ‘sto cancro porco mondo!

Luigi Nadalet, Nizza

1
Ciao, come possiamo aiutarti?
Powered by
Share This
Design by Alfred Team | Made with ♥ in WordPress